Kursi i Euros bie përsëri, prek minimum të ri historik në 95.73 lekë
Monedha europiane vijon rënien, e ndikuar nga oferta e lartë dhe kërkesa e dobët në tregun valutor.
Kursi i këmbimit mes Euros dhe Lekut ka shënuar një tjetër minimum historik, duke zbritur në 95.73 lekë, sipas kursit zyrtar të Bankës së Shqipërisë. Ky është niveli më i ulët i regjistruar ndonjëherë për monedhën europiane në raport me Lekun.
Që nga fillimi i vitit, Euro është zhvlerësuar me 1.1%, ndërsa në krahasim me të njëjtën periudhë të një viti më parë, rënia arrin në 3.8%.
Ofertë e lartë dhe kërkesë e dobët
Sipas agjentëve të këmbimit valutor, tregu po karakterizohet nga një ofertë e shtuar e Euros, ndërkohë që kërkesa mbetet e kufizuar dhe shfaqet kryesisht në fund të muajve, kur bizneset dhe individët kanë nevoja për pagesa në valutë.
Kjo situatë ka ushtruar presion të vazhdueshëm në zhvlerësimin e Euros, duke e shtyrë kursin drejt niveleve gjithnjë e më të ulëta.
Ndikimi i turizmit dhe ndërhyrjet e Bankës së Shqipërisë
Me nisjen e tremujorit të dytë, pritet që oferta valutore të rritet më tej, sidomos si pasojë e sezonit turistik. Edhe pse hyrjet e turistëve në muajt e parë të vitit kanë qenë relativisht të qëndrueshme, presionet për forcimin e Lekut kanë vijuar.
Burime nga tregu bëjnë të ditur se Banka e Shqipërisë ka ndërhyrë vazhdimisht për të frenuar rënien e Euros, por pa arritur ta ndalë plotësisht këtë trend.
Gjatë vitit 2025, banka qendrore bleu rreth 1 miliard e 27 milionë euro, kryesisht për të rritur rezervën valutore, por edhe për të zbutur forcimin e Lekut. Kjo shumë përfaqëson një rritje prej 10% krahasuar me një vit më parë.
Planet për ndërhyrje dhe faktorët fiskalë
Për vitin 2026, Banka e Shqipërisë synon të rrisë më tej blerjet e valutës në tregun e brendshëm, duke planifikuar ndërhyrje në intervalin 330 deri në 450 milionë euro përmes ankandeve.
Në të njëjtën kohë, politika fiskale duket se po ndikon në forcimin e Lekut. Suficiti buxhetor për dy muajt e parë të vitit ka arritur në rreth 130 miliardë lekë, me një rritje prej 11.5% krahasuar me një vit më parë.
k.jpg)